Mar 9:14-29 | YomNWM | STEP | Buna batula kuba minlonguki ; bamona nkangu wu batu wuba zungidila ayi milembo findana ziphaka ayi minlongi mi Mina.

Mark 9:14-29

Yesu wubelusa muana wuba pheve yimbimbi

(Matayi 17.14-21 ; Luka 9.37-43)

14 Buna batula kuba minlonguki ; bamona nkangu wu batu wuba zungidila ayi milembo findana ziphaka ayi minlongi mi Mina. 15 Vana vawu nkangu wu batu buna wumona Yesu, wusimina ngolo. Buna batu boso bazawula mu diambu bamvana mbote.

16 Buna wuba yuvula :

—A diambu mbi lulembo findinina yawu ziphaka e ?

17 Mutu wumosi wuba muna nkangu wumvutudila :

—A Nlongi, ndinatiningi muanꞌama wu bakala widi pheve yi dibaba. 18 Mu kioso kuandi buangu Pheve yimbimba yawu kumbuila, yeti kuntutumuna ngolo ayi weti totula difulu mu munu ; weti kueta meno, bosi nitu yifueti mana kangama. Khembi minlonguki miaku muingi mikuka pheve beni vayi misi nunga ko.

19 Yesu wuba vutudila :

—Tsungi yikambulu minu ! Zithangu zikua ndiela kadila yeno va kimosi e ? Zithangu zikua ndiela buela kangila ntima mu bila kieno e ? Lundatina niandi.

20 Bantuadila muana beni. Pheve yimbimbi bu yitumbu mona Yesu, yitutumuna muana beni ; muana wulumbama va tsi ; muana wumvindumuka va tsi. Difulu dieka ntotuka va munu.

21 Yesu wuyuvula dise diandi :

—Tona thangu mbi katonina mona ziphasi ziazi e ? Dise diandi divutula :

—Tona mu bumuana buandi. 22 Zikhumbu ziwombo Pheve beni yimbimbi yeti kunlumba ku mbazu voti mu nlangu muingi yimvonda. Enati wulenda vanga diambu, bunabika wutumona kiadi, wutusadisa !

23 Yesu wumvutudila :

—Enati wulenda ! Mambu moso malenda vangama kuidi woso mutu wilukidi !

24 Vana vawu dise di muana diyamikina :

—Nguilukidi, wutsadisa mu kambu kuama ku minu.

25 Yesu bu kamona ti nkangu wu batu wulundumuka, buna wutemina pheveyimbimbi ayi wutuba :

—A Pheve yimbimbi yeti kanga mbembo ayi matu ma muana, minu ndikutumina : Totuka mu muana wawu ayi muisi ko thangu mu buela vutuka mu niandi.

26 Pheve yimbimbi yiyamikina, yitutumuna muana beni, bosi yitotuka. Muana beni weka banga wufua. Diawu batu boso baba vana batubila : “Yimeni, fuidi.”

27 Vayi yesu wunsimba mu koko, wuntedimisa, bosi muana beni wutelama.

28 Yesu bu kakota mu nzo, minlonguki miandi mieka kunyuvula va bawu veka :

—A bila mbi beto tusi nunganga ko mu kuka pheve yoyo e ?

29 Yesu wuba vutudila :

—Pheve yi phila yayi yeti totukila kaka mu lusambulu ^{▼▼minkanda minkaka misonika : pheve yi mpila yayi yeti totukila kakamu lusambulu ayi mu kukifuisa nzala mu lusambulu.}.